Accueil > S tmazight > Isallen > Id’ n warruzen iberkanen
Id' n warruzen iberkanen
Seg γur Sεid BAJJI
mardi 24 août 2004
par Masin

Tenfalay tallunt n unnli-nu, cerrgen ifaliwen n iseqsiten tawengimt-inu, nsin ixemmimen n yid’ aberkan g wul-inu. Id’ n 25 g yulyuz izrin, llig iyi-ittuγer s yisem-inu, nek iwiγ ad werriγ, leqqfen-iyi iγallen ur dmiγ, yasi imiker tafekka-nu isgirten zeg uksum, iger-iyi g t’umubil g llan sin irgazen d’nin, taγ-iyi titi aneγ anafella d tr’emmuyt tanafellat, isew-iyi wuzzal s titi γer tgercit.

Ur ukiγ d ixef-inu allig iyi-isfafa lhezz n t’umubil d-yusin lmal i wass n ssuq, ar ttbaylellaγ d nek idis i tleggwit n wasif n Sr’u ur iεriqen i Lehri kigan, γer d-nezγeγ akers’uh’ s ibuccar ur igin zzig-i ; Kud ttekkreγ utt’uγ g igran igan γas isennanen, tager tatt’utin-inu tnekra, iddeγ sh’izuneγ zeg ud’ar az’elmad’, ruccan idammen iyi-d-ikkan zeg imi d tinzar lashab n Lehri, is’fu wudem-inu, imil llig d-ktiγ idammen yuzzlen g tmazirt-a aseggwas n 1914, infaja unnli-nu, isineγ is zrin Ir’umiyen islixen n imasayen-nnsen g imenγi n Lehri, nz’uγ is tga twala tinu teg tin iεerrimen imaziγen, mi ila ad rarin tamazirt asin tillaf n tlelli zeg ihz’iz’en d-uğan Ir’umiyen, ay-ad ag skennan turin i tγensa-nu, tuc-iyi tukt s ur ttegwdeγ, ula aγuleγ d’art.


Zegus d-yiwed’ ud’ar-inu, g tiram timezwura wass n 26 γuct 2004, ammas n temdint n Xnifra, dduγ γer lbulis ad serseγ ikmez xef warra uwehh’a, sikiγ-ten s warruz teča thitur’t-inu,imil giγ-tt i uqerru-nu g ddiγ s ud‘ar γer wis mi ur inni ad asen-ffγen warruzen-inu tugi.

Tifawt, iwiγ abrid γer s Aγbalu n Ayt Sexman mγar iyi-ibzi wudem tekcem-iyi tawla, iddeγ ur inni uya ad iyi-irar γer d’art xef twuri taγensant, ur ssineγ is d wi mi ttreγ amur a γa yirin ad t’urqen ayt uxam-inu ur d-yiwin aneγmis i mayed ijran g id’ aberkan, ar ttalin ar tt’aren ad iyi-rzun, is mmuteγ mad ddreγ.

Tqerres twengimt-inu, ackin-as ifilan n iseqsiten xef may msin wis iran ad iyi-isennegza ussan, d may msin ined’liben n tudert n Imaziγen, mec ur ten-gin iγibuben d imazdaren g imdanen, wis mi ur telli ca n tmazirt ur as-ssiγen alud’, irsan ass-a ss’ifet n lbulis d isems’aren n ikabaren, gin imasayen n lmexzen, wid ikksen adif n temmuzγa i tmesmunin, isselhu-ten s ih’idas d icett’ih’en, grin-asen i uhaleffa xef igulaz n yidles aεrab, derrfen-asen alluten s uslix-nnsen.

I wis iyi-icetcin mma s uγri, irin ad zriγ aslix-inu g Lehri, aγuleγ d’art, a ten-snimmreγ is ucan tadusi yad’ d wafa n tγewwaγt i wul-inu, ur innin ad ixsi ard texsi teftilt n tudert-inu, isinen is ur inni ad asen-d-yas uslix-inu i walluten icett’ih’en, maca ur d-ittasa γas i tillaf n tlelli.



Sεid BAJJI

Articles dans la rubrique :

Isallen
09/08/04
0
Awanek n Murit’anya iga yiwen uneqqis ghef ubellen mgal isnuheyuyen i g teg unabad’. Aneqqis agi (...)

Lire l'article


Rejoignez nous