Sinistri (extrait)

Sinistri : Tezrid’ amek an-nexdem ihi ! Tessned’ tinna akkenni ikkaten aγyul ittdaray tabarda ?

Buzit’war’ : Ih !

Sinistri : Ihi an-nexdem akkenni ula d nek°ni ihi.

Buzit’war’ : Amek ?

Sinistri : Dabur’ ad rreγ iman-iw ur k-ssineγ ur yi tessined’.

Buzit’war’ : Amek at-tsemmh’ed’ dg-i ? Γ ur-k ad tssemh’ed’ dg-i lumeεna ha !

Sinistri : Ur ttsemmih’eγ ara dg-ek a wlidi. Ar’ğu tura ak-d sfehmeγ amek i ylaq a nexdem.

Buzit’war’ : R’uh’, a k-isent’eq r’ebbi ar lxir’.

Sinistri : Ih ! Axat’er’ tura lukan a d-tnet’qed’, lukan a d-tinid’ kan akkagi awal amect’it’it’uh’ kan akagi, dγa nutni dayen a k-cudden din din, u ad kkaten, ad kkaten, ejbed, ejbed, ur ak-ttserrih’n ara alamma tqerred’-d ula s wayen ur nelli. Iih, ula I k-ittawin, aqli nniγ-ak ! Naγ muli a k-d-ikker uεejmi r’beεt’ac.

Buzit’war’ : Amek ihi i glaq ad xedmeγ ?

Sinistri : Ihi eğğ-iyi tura a k-d-sfehmeγ.

Buzit’war’ : Ih ! Ihi sfehm-iy-id ihi keččinni. Axat’er’ nekkini tura, nekkini akken iy-id-tennid’ ad xedmeγ.

Sinistri : Ih ar’aği tura a k-d-sfehmeγ. Nniγ-ak ad tr’uh’ed’ weh’dek ar wexxam n ccr’eε. Yak lakunbukas’yu nni attan γur-k i tella ?

Buzit’war’ : Ih bbwiγ-tt-id, attah γuri.

Sinistri : Nekkini a k-in tebεeγ deffir imiren.

Imuqel ach’al ssaεa. Attan dγa d lweqt, r’uh’ tudeswit eh ! Yerna imaren m’ara k-d-issiwel diğğij, Sirpeyyir’ i s-qqaren, netta mi k-d-inna lh’aga, kečč in-as beεεε...

Buzit’war’ : Amek, amek ??

Sinistri : Netta mi k-d-inna lh’ağa, kečč in-as beεεε... Daya, γurk anda, beεεε... Err iman-ik d ayagi kan ay tessned’. Anef-as ma yehwa-yas ad ittjellib ar igenni. Keččini akkagi kan. Mi d-int’eq ar γurek, keččini in-as beεεε...

Buzit’war’ : I apr’i, amk apr’i imiren ?

Sinistri : Apr’i imiren, nekkini as-iniγ ; aweddi, anef-as aweddi, t’ixr’-as ad ir’uh’. As-iniγ : ir’h’em waldik dγa dacu ara tcar’εed’ dg-es tura wagi. Meskin atan am netta am ixer’fiyen nni ines kif-kif-iten. Wagi efk-as tameqq°int lleh’cici anida I k-ihwa zzuγr-it. Anef-as ad ir’uh’ ad ikes leh’cic aff yiman-is, t’ixr’-aγ a weddi.

Buzit’war’ : Ih, ih, in-as Buzit’war agi, in-as am izimer akessas, in-as ur ikkat ur ixebbec.

Sinistri : Ih, ih, as-iniγ laprub sik hatah : yessen kan ad d-yini beεε.

Buzit’war’ : Awi, welleh ma tennid’-as akka i diğuj, aql-ak-id ad tečč.

Extrait de la pièce de théâtre "Sinistri" : Adaptation par Muh’ya de "La farce de Maître Pathelin" (auteur inconnu).


- Lire les autres articles de la Rubrique "Mohya"