A nekker ghef Tmurt Taqbaylit !

Deg wakud-agi ideg nella, Tamurt Taqbaylit la tettmagar ussan d iberkanen. Adabu azzayri yesseɣli-d rrehba deg wulawen. D imeyyaten n yeqbayliyen d teqbayliyin i yettwaḥebsen di lbaṭel. Aṭas deg-sen i wumi semman irebraben, ḥekmen-asen alamma d 20 n iseggasen, llan kra s lmut xas akken ur yelli dacu xedmen. Kra deg-sen tɛeddan fell-asen di lḥebs, am Sliman Buḥefṣ i d-yemmeslayen ɣef temsalt-agi deg tsenbaṭ. Tisenbaḍin iɣef ttḍebbiren wid i d-yerran Tamurt Taqbaylit ger wallen-nsen, wid igan taxazabit-nni n Laṛebɛa Nat Yiraten iwakken ad ḥekmen s lmut i 54 n yemdanen.

Rnu ɣer waya, aṭas n imusnawen d inaẓuren iɣef i d-sseɣlin ẓẓmik neɣ iwimi gezmen abrid akken ur tteffɣen ara ɣer tmura tibeṛṛaniyin, am Uleḥlu, neɣ Yunes Adli ur ǧǧin ara ad yeg asarag-ines di Yennayer yezrin.

Nekk°ni s yeqbayliyen yellan di beṛṛa ur ilaq ara a neqqim a nettwali taluft yecban tagi, ur ilaq ara ad iɛeddi fell-aɣ uzaylal neɣ a nettkel kan ɣef tseqquma tigreɣlanin neɣ ttawilat d tdukkliwin tibeṛṛaniyin, tewwi-d fell-aɣ a nekker. Agraw “Tanekra ɣef Tmurt Taqbaylit” (“Action pour la Kabylie”) iga tiɣri i yeqbayliyen yettidiren di Fṛansa d imeddukal-nsen i wakken ad lḥun meṛṛa ass n lḥedd 12 di meɣres ɣef 14h arma d 18h di Lpari, si Bastille ɣer d Place de la Nation, i wakken :
– Ad yettwakkes lbaṭel d ddɣel n Udabu azzayri amesbaṭli ;
– A d-ffɣen si lḥebs imeɣnasen n tsertit d wid yettwaḥebsen ɣef tiktiwin-nsen ;
– Ad ikfu ẓẓmik d-yeɣḍel udabu azzayri ɣef imeɣnasen iqbayliyen ;
– A nḥettem, akken texdem yakan “Amnesty International’’, ɣef udabu azzayri ad yekkes leḥkem s tmettant i d-yesseɣli ɣef 54 n yemdanen di temsalt-nni n Laṛebɛa Nat Yiraten.