Isali

I tikkelt nniḍen, Tamurt taqbaylit yewwi-d fell-as ad tmager leḥris d ẓẓmik werǧin tesɛedda. Adabu azzayri ibges-d ad yesseɣli Taqbaylit : ama d imdanen-is, ama d ayen akk° yesɛan assaɣ ɣer teqbaylit (“opération zéro Kabyle”). Ar imira, d imeyyaten n teqbayliyin d yeqbayliyen i yettwaḥebsen di lbaṭel. Kra seg-sen ttwaḥebsen mebla ma bedden ar cṛeɛ. Kra nniḍen, tifrat-nnsen d jjiḥ d trewla ar tmura medden. Rnu ɣer waya, taɣdemt ur telli yara d tamsalt n Wezref. Taɣdemt n udabu azzayri ur tedd’ara deg webrid n wezref, tuɣal d abrid i kra n yemdanen n udabu akken ad ssnegren Iqbayliyen. Ur d-yeg°ri i Weqbayli ayen i ɣef ara ysenned neɣ ayen swayes ara yqabel, izerfan atnad ger ifassen n wid yettḍebbiren. Akken s-qqaren : “iwwet-iyi uṛumi cetkaɣ i gma-s”. Adabu azzayri, am useḥḥar, la d-yesnulfuy isuḍaf iwakken ad icemmet kra n wayen illan d aqbayli. Adabu-yagi issekcam deg wallaɣen aɣunzu n Teqbaylit d tid d wid yettnaɣen fell-as.

Aṭas n yeqbayliyen i rran d “irebraben” xas akken ur gin kra. Ttwaṭṭfen, ttwaḥebsen, llan wid ɣef ḥekmen s tmettant. Adabu isselḥuyn “taɣdemt” s ẓẓur, isseɣli-d tugdi ɣef yemdanen. Arebrab d win d-yesseɣlayen tugdi ɣef wegdud. Tikerkas-agi n teɣdemt, illan mgal Izerfan igreɣlanen urwent-d ayen ur iqebbel wallaɣ. Aṭas n yeqbayliyen i yettwaḥeqqren, i wumi yettwakkes leqder ; llan wid yettwaṭurṭurin, llan diɣen wid i wimi yettwakkes sser. Tin i tent-yugaren, ɣer tagara-yagi, adabu azzayri yesnulfa-d asaḍuf (article 87-bis) swayes ara yegdel kra n tmuɣli neɣ n tikti ara s-d-yezzewren ɣer zzat, ladɣa timsal yeɛnan Tamurt taqbaylit.

Xas ɛeddan 40 iseggasen umennuɣ ɣef izerfan-nneɣ, Tamurt taqbaylit tufa-d iman-is i tikelt-nniḍen ger waccaren n iserdasen d icuḍaḍ n ddin akked miḥyaf. Adabu azzayri, s srabes-ines d iqeddacen yezzuzer di yal tama, yesseɣli-d rrehba ɣef Tmurt taqbaylit. Kra n wayen ur nettɛeddi ɣef ufus-is neɣ ddaw leɛna-yas yuɣal d awezɣi ad yettwaxdem, ama d leqdic n tdukkliwin, ama d win n tsertit neɣ win imusnawen d inaẓuren. Kra n win i d-ibanen iqeddcen ɣef tmetti d wegdud aqbayli rran-t ɣer rrif. Ma ur teḥbisen ad gallen deg-s. Ayen uɣur i d-yebges tikelt-agi udabu azzayri werǧin t-iga. Yekkes i waṭas n yeqbayliyen ula d azref n tuffɣa d unekcum ɣer wakal-nnsen.

Iqbayliyen yellan beṛṛa n Tmurt-nnsen, sbedden-d Agraw swayes ara qablen si tama-nnsen tagnit-agi n rrehba d rrebrab i d-yesseɣli udabu azzayri ɣef Tmurt taqbaylit. Di temlilit-nnsen tamezwarut, ass n 8 yennayer 2023 di Montreuil, begsen a d-sbedden agraw iwumi semman “Collectif Action pour la Kabylie” (CAP-K). Tikti-nnsen tamezwarut d asemlili n imeɣnasen d usnerni n tezmert d iɣallen ara d-yilin nnig tektiwin tisertanin n yal yiwen. Deg wegraw-agi, llan wid iqeddcen yakan di tdukkliwin, llan inaẓuren, llan imeɣnasen n imussuyen d wid n ikabaren n tsertit. Yessemlal-d kra n tin d win yebɣan ad yennaɣ ɣef Tmurt taqbaylit. Iswi amezwaru n wegraw d asufeɣ n Tmurt Taqbaylit di tegnitt-agi taberkant ideg tella, d ibeddi ɣer tama n imeɣnasen d truẓi n lxuf d tsusmi i d-yesseɣli udabu azzayri ɣef yeqbayliyen.

Ala tadukli n iɣallen d umeslay gar-aneɣ swayes i nezmer a nekkes lbaṭel-agi i d-yeɣlin ɣef Tmurt taqbaylit. Akken bɣunt mgaradent tmuɣliwin-nneɣ, akken yebɣu yemgarad wakken nra azekka n Tmurt taqbaylit, tewwi-d a nesseḥbiber akk fell-as di tegnit-agi ; d wagi i d-iswi n wegraw-agi i d-ilulen. Tiririt n leqder d lhiba i Tmurt taqbaylit yessefk a d-kken sennig wayen yellan. Ɣef aya, tiwwura n wegraw (CAP-K) ldint i yal yiwen, i yal yiwet iran ad yeddu/teddu deg webrid-agi, ladɣa wid d tid yellan di Luṛup akked Marikan.

Agraw ‘Tanekra ɣef Tmurt taqbaylit ’
Collectif Action Pour la Kabylie (CAP-K)

Lpari, ass n 31 di Dujenbeṛ 2972 (11 janvier 2023)