Accueil > S tmazight > Tullisin - Asnulfu > Amwan n uccnen
Nouvelle - Tanfusit
Amwan n uccnen
sghur Sassi Dehmani
mercredi 9 juin 2004
par Masin
Talluzit s tenfusit (Tamazight n wedrar n Infusen)


AMWAN N UCCENEN

Uccen d awessar yisi igeâmez g thufret nnes, s iseggasen d netta yehrez.
D igen s wadin n uccanen ileh’rfen, iseqdeâ tameddurt-is d netta ittazzel deffer tiwji m utcu. Yegic tbuqâet as yeflic negh ccellag llhiwan y tcic sis izmer negh sen. Yessen inilta n ddunyet d dis yila mmuten d netta yeqqim yedder.
Assu y mgher d ur yezmer ayetc g ddist-is d izmaren n xxul
rah’en uâeren afellas, alaz irenni, ttallast tenned sis, yeh’cu g thufret weh’des, la mammu yesseni, gher ixsan ttemqaqasen jar tittawin-is alemmi yerni afella-s lhelwas, izerr id ikmel g-izmaren tnegzen zzates, iladdayen-is tseksken d i-ssuggam lemmi igen s wadin n izmaren a yuda jar idarren-is.

D uccen yegic tasbaxt wet yenkidc, yethuffu id ikmel deffer
adus n wisum, adann-is ttezfen d isinn-is tsetren allemmi an-tyezzu am tadriwin g tekrumt n igen s wadin n izmaren.

Manis yerni afella-s lhelwas d irah’ yuser mallik meââadc ghers ljuhed bac ay wett af iman-is, yukez belli inilta n xxul uâeren d uccanen llamahud wuh uci uâer d ammi ufinc matta a-tcen tteten g iman nsen.
Amyu yegged ay neggez afellas igen s wadin n uccanen ileshmen d at yetc gher ammi yeswa aman d ayu s matt ixemmem ay rwel xir-as d ay ali l wedrar, balek ay af thufret ay seqdeâ dis leâqab n ussan-is.

Ggid s wadin n idan hman n amwan yewya abrid g yettem yeggur, y tsettel ab accar bac uzerrentic allemmi yewwed l-wedrar d yufa txujnet tevza lejjaj jar idvaven, amyu yutef ttarjijit teggay dis.

Qdeâen afellas iseggasen d netta yehcu g wedrar, yuser, tafenzuzt-is tneqqel d id’arren-is qquren s usemmid’, yetmita g adin n izmaren la rahen afella-s, ickelt ay af tyardest, ickelt tili temmut d ickelt ay qqim blac.
Tamettant tqerreb sis, yerni afella-s axetref, ijjujaf s iberkas d izmaren alemmi yehbel s alaz d irah’ issufagh
g ixef-is s thufret d iâegga, iâegga id ikmel.
D ayu d lhal n tmeddurt ussan gguren, izmaren ttazlen
d uccanen iwessaren aqqimen âeggan !

Sassi Dehmani

Articles dans la rubrique :

Tullisin - Asnulfu
17/05/04
0
Mazigha, tin h’emmlegh Wagi d yiwen seg imeddukal-iw i th’uza tedyant unebdu n 1985. Wwint (...)

Lire l'article

29/04/04
3
Macahu, tellemcahu. Ad teghzif amm ugatu. Herd’en-d yitsen inegmaren izem. Irwel, ikcem s yiwet (...)

Lire l'article

15/04/04
0
Aselway n tmurt izerâen adrim kra yekka usegg°as di yal tamnat’ n tmurt ansi yaada, ised’meâ maci (...)

Lire l'article


Rejoignez nous