Accueil > S tmazight > Tullisin - Asnulfu > Mazigha, tin h’emmlegh
Mazigha, tin h'emmlegh
sghur Saâid n’at Chemakh
lundi 17 mai 2004
par Masin

Mazigha, tin h’emmlegh

Wagi d yiwen seg imeddukal-iw i th’uza tedyant unebdu n 1985. Wwint ibulisen gher lh’ebs imi yettekka di tmesbanit d-yed’ran di 20 tuber’ 1985 di Draâ Lmizan, tamesbanit i xedmen inelmaden ssuturen di leh’kem a d-id’laq i ymeh’bas n Tmazight d Izerfan n Wemdan. Asmi d-yeffegh umeddakel-agi si lh’ebs di tefsut n 1986, llan wid i yeqqaren aqcic-agi idderwec, a yesxewtir... R’uh’agh z’righ-t-id, inna-yi-d tamacahut n Mazigha, tamazight ih’emmel... Mi yas-sligh i tmacahut, ufigh tefka anzi gher taghect nni n Fer’h’at “Aqcic d uâett’ar”, dgha nnigh-as ghef aya. Yenna-yi : xat’i ! D acebbi kan i tt-tcebbad’ : timucuha ur mcubant ara akkw !

Attih tenfust, init tamughli nnwen !...

Tayri nnegh tefka isegmi. H’emmlegh-tt th’emmel-iyi, acu ar a-d-nernu. Tefka afus-is, fkigh-as afus-iw ; a-d-tettad’sa, a s-ttad’sagh. Tin ukud a rregh axxam ! Nessarem si zik a neddukel, talwit ad tili yid-negh, a tt-id-nedj i tarwa nnegh. Mazigha th’emmel-iyi : iban ghef allen-is matchi arma tenna-t-id. Z’righ d nettat kan i sâigh, d nek kan i tesâa. D atmaten akken i dagh-d-tedja yemmat-negh Dihya d babat-negh Aksel, d babat-negh ameqran Masensen asmi mmuten akken a nidir di liser d yisegh di tmurt nnegh. Weltma-agi teqqim-d ghur-i. D igujilen i nella. Asirem izdegh ulawen : ussan iberkanen ad faken, ad aghegh Mazigha, ad tt-sfer’h’egh, ad teffegh targit gher tilawt, ad ifak fell-agh ddel.

Nezdukel ifadden nnegh, nebda a nxeddem. Tamurt tefr’eh’ s tarwa-s igujilen, tefka-yasen-d timz’in, irden. Di tzeqqa, ur agh-inghi usemmid’, yalci yugar fell-anegh.

Yiwwas, attaya tudef-d yiwet n tâet’t’art si tmurt n wid ur yettseth’in s lâar n babat-sen, a tetteddu, tettettar (negh tetmetra akken qqaren kra !). Tghad’-iyi, ffghegh ad as-muddegh cwit’ n inighman, n zzit uzemmur, awren n yirden, sin ijeqdur’en...

Tamet’t’ut, ayen deg i muqlegh deg wallen-is, bghigh a tt-d’erqegh ssyen. Maca awal ur t-id-nnigh : tezwar tewwet-iyi-d s lh’erz s idmaren, tughal taâlleq-iyi-t-id gher temger’t’-iw. Seg imiren, ur z’righ anda ddigh, wala amek lligh, wala d acu i lligh, ughalegh ttmeslayegh tutlayt matchi inu.

Tamet’t’ut nni tekcem axxam-iw, tccemt-iyi ger lghaci nek ur faqegh. Terra Mazigha d taklit fell-as, Mazigha ad tekrez, tezreâ, temger, tesserwet, tez’d’ ; mi yewwa seg-s ur tettett. Tin nnid’en, Mazigha tughal s adaynin, tettd’eggir fell-as temghart-nni ighighden akken rghan. Mi kkregh a d-net’qegh amzun d takmamt i yughalen i yimi-w, ur zmiregh ad sughegh : awal yegguma a d-yali di tgerjumt. A yir ussan melmi a tfakem !

Yiwen yid’ akken, tceggeâ-iyi tgezzant-nni tenna-k : “Err ghef ayla-k ! lxweggan kecmen-d gher-s, wwd’en-d s aseqqif...” Fghegh ihi s imnekcamen-nni a ten-ssufghegh si tmurt-iw, ur s-nnigh ad ffghen armi qrib ifuk cit’ ufud-nni d-yeqqimen si tegrawliwin yezrin asmi d-kecmen wid yellan akin i Wegrakal gher Tmazgha. Nedfen-d akk ideddyen-iw.
Mazal cit’ ad yali wass, nnigh-as tura dayen ifukk umennugh ad ughalegh s axxam. Deg webrid, tâerq-iyi tmeslayt-nni n tgezzant, mmektagh-d tutlayt n imarawen. A leh’h’ugh : ayen deg i yi-tefka tewwurt, ghligh deg agens, idim yettquddur seg-i.

Tagezzant akken twala a ttmettategh teffegh s azniq a tettsughu tessawal i watmaten-is anda ma llan a d-asen ad zedghen axxam.

Mazigha teghli-d fell-i a tettru, imet’t’awen ad tqudduren ghef udem-iw am tmeddelwit. H’ulfagh i tcenfirin-is yerghan ghef teksumt-iw. Ah ! xersum d snat tmiqa.Mazal Mazigha tettru nek ttakigh-d cwit’ cwit’. Mazigha, imet’t’i-yis yughal d isefra, d timucuha, d amezruy. Attaya deâwessu nni tekcem-d, tâedda a tt-tekkat arama a ttazalen seg-s idammen, mlalen d wid yemmaren seg-i, uzzlen d ih’emmalen. Tagezzant tezzugher-anegh s adaynin h’ala yiwen usfaylu i yesâa, si cit’ n tafat d-ikecmen seg-s, nettwali deg uh’emmal n idammen amek yebd’a d tiregwa. Tamurt-nnegh ukk tughal d tazeggaght. Bdan ijeddjigen iwraghen a d-ttemghayen, idammen ttazzalen kettchmen ula s iz’ekwan n ibabaten-nnegh : wid nghan imawlan n tgezzant. Idim yekcem tinet’lin n imarawen yemmuten akken ad agh-tt-id-h’arr’en asmi ttgallan "Tamazgha n Imazighen", nnsen yiwen ur asen-tt-itekkes ! Urzen-anegh s ssnasel nek d tin h’emmlegh, di tillas nni nwala tawlellest tebgha ad teddj amkan i tafat, tillas ad ftutsent. Nwala it’ij mi d-yenqer, tafat-is tiwed’-agh-d. Zzigh gher Mazigha yellan mazal-tt ghef yedmaren-iw, muqlegh-tt, h’ulfagh d azghal nni i yi-d-tefka i yi-d-yessakin. H’ulfagh zemregh ad beddegh, maca mi kkergh a jebbdegh di ssnasel ugint ad qqarsent. Ghas akken ttwarzegh, nnd’egh-d afus-iw i tin h’emmlegh, nettat daghen tenned’-d afus-is i tiddi-yiw. Nezdukel ifadden-nnegh, bdant ssnasel a ttenququlent. Tafat a tettnerni, Mazigha tewwi-d asefru dayen ur wwint tezmamin. Tazwara-yis d asirem :
"Nettruz’u, ur nkennu
Tilelli a tt-nemmager
Tafat gher-s a neddu
S wayen nesâa a nekker..."

Ass-a, h’s’igh awway i yi-th’emmel Mazigha, dayen ur zmiregh ad ktilegh : d nettat i yi-d-yerran gher tudert mi wwd’egh gher tizi n tmettant. Nejbed ssnasel nquqlent, mazal cit’ ad rrz’ent, di tallit a d-iteddun a d-ttwakksent. Iâett’aren ad ffghen axxam akd tmurt-nnegh, inagh ur tufid’ win i yasen-yessekran. Seh’h’ren-iyi ad ughalegh d yiwen nnsen ad amnegh s wayen ur nelli d tilawt, ad idiregh s wesweghwegh n tgerfiwin. Urzen-iyi, yerna qqaren i yeâciren "ur yettwarez, ur yelli" ! a yi-tth’ettimen akken ur ttamnegh s wayen i z’rant wallen. Ssnasel i yi-cudden, abrid-agi ur ttamnegh ara acku asirem yezdegh ul-iw !

Yiwwas, a neffegh gher tafat-ina a ttwaligh a d-tekcem si ccqayeq. Tamazgha, tamurt-nnegh ad idiregh nek d weltma Tamazight akud lligh. Ad iz’iden wussan-nni acku imal ihegga-yagh-d tament, talwit, tayri d tudert igerrzen. Deg imal, targit a tt-nerr d tilawt, nek d Tmazight s ifadden n tdukli-nnegh.

Saïd n At Chemakh

Articles dans la rubrique :

Tullisin - Asnulfu
09/06/04
0
Talluzit s tenfusit (Tamazight n wedrar n Infusen) AMWAN N UCCENEN Uccen d awessar yisi igeâmez (...)

Lire l'article

29/04/04
3
Macahu, tellemcahu. Ad teghzif amm ugatu. Herd’en-d yitsen inegmaren izem. Irwel, ikcem s yiwet (...)

Lire l'article

15/04/04
0
Aselway n tmurt izerâen adrim kra yekka usegg°as di yal tamnat’ n tmurt ansi yaada, ised’meâ maci (...)

Lire l'article


Rejoignez nous