Ḥkummt n Tiknukraṭi …

Azmez 17/12/2011-2961 udl-aɣ dis lemmi isi-ɣ g lqiṭar seg Napoli in Milano talji(Tajji) mi ssneɣ yused g elbal-inu ad-riɣ s kra n tawalin f elli yella it-ṣara g tmura ,seg matta mmal-nas asuffeɣ ḥkummet n tiknukraṭ elli exs-en essis ad-suffɣ-en iwdan se gag n 8 iyyuren g umennuɣ jar elli it-naba s ikkas n uqeddafi (asekkur) d elli yexs-it ad-yeqqim d iddafeɛ fellas.
Tawalin ted-hat taḥerfit exs-ɣ ukan ad-mmla-ɣ matta g elxaṭr-inu, ad-eqqimen isekkilen s yal tilɣiwin d inigan f tamara-inu, aḥulef-inu asafar-nnes tira-inu.
Semd-iɣ-t g Djerba ass n 26/12/2011-2961 tama n Ḥumet n Essuq, awal mi medda maca nuc-as tazwara d tagara ayed netta.

Ḥkummt n Tiknukraṭi …

Riɣ ad-ari-ɣ seg lemmi
Kems-eɣ izerfan g imi
Igi-ɣ ḥruz i tilelli
Riɣ ad-ezni-ɣ seg lemmi
Mmal-nas “ḥkummt n tiknukraṭi … “

S imesli, yuli
Ṭaṭ wammas, wali
S iẓaf, yugwi
Taṭṣa f ufgan, tawezɣi
S urrif, yukwi
Asemdi n tikli, tamalli
Mazeɣ yewwa, yuri
S isekkilen seg izri
Riɣ ad-enki-ɣ-t seg lemmi
Mmal-nas “ḥkummt n tiknukraṭi …"

Amehras, abuhli d ajeṭri
Izelmazen merrd-en f amur-i
Slubbḍ-en d eww-an tafuri
Jugg-en cgugḥ-en, alemmi
Mani ya-tḥrz-em talji
Eğğ … nella
Effeɣ …imir-a
Nuḥḥel seg yir n tmusna

Mmal-nas "ḥkummt n tiknukraṭi …"
Ilaq, at-taweṭt mammek nuri…


Madɣis Buzaxar