Accueil > Dossiers et documents > Tilelli : 1994 - 2014 > TADYANT N TILELLI : REẒM-AT TIMEḤḌA-NNUN !
TADYANT N TILELLI : REẒM-AT TIMEḤḌA-NNUN !
jeudi 15 mai 2014
par Yafelman
Simraw (vingt) n iseggwasen ay-a izrin ɣef tedyant (affaire) n Tilleli. Ad d-nessemktey winna ur issinen d winna ittun : G umenzu g mayyu 1994, tyamẓen g Imtɣren ssa n yimeɣnasen n tmentilt (cause) tamaziɣt g llan imaslaḍen n umaris (bureau) n Tmesmunt tadelsant Tamettit Tilelli illan g Tizi n Yimnayen.



Itteyameẓ Σli Ḥarcerras, Ṭaws M’bark, Σli Ikken, Σumar Derwic, Ḥmad Kikic, Σli Uccna d Saεid Jaεfar, acku amun g twada n umenzu g Mayyu g usin iɣarrasen (banderoles) ityarun s tfinaɣ, ar ssuturen ad tili tmaziɣt adɣar-nnes g tmazirt-nneɣ, ad ttuɣer g yiɣerbazen, ittufek-as wuddur-nnes amm nettat amm akw tutlayin (langues) yaḍen.

Tilelli ! Mayed ur issinen tur-a Tilelli ? Isem n tmesmunt-ddeɣ igzem amezruy n Umussu amaziɣ g Tmazɣa Tutrimt (Tamazgha Occidentale). Iga amm tgezzayt irecmen ɣef wudem n Tizi N Yimnayen. Tga amdya (exemple) n waddur d tixxitert. Mayed awed ur issinen tadyant-nnes ? Kigan g yimenɣnasen n Umussu Amaziɣ ssnen mayed ikkan ɣef imaslaḍen n Tilelli. Ssnen is amun ikrafen-ddeɣ n 1994 g mayed issadan tamaziɣt ɣer dat g tmurt-nneɣ. Ssnen idd mayed d akw ikkan deffer n tedyant n Tilelli seg yinaw (discours) n Ḥasan wiss sin n ɣuct 1994 g isawel, g tikkelt tamezwarut, ɣef asɣri n « tantalatin (dialectes) timaziɣin » g uɣerbaz ar asnulfu (création) n Usinag (Institut) Ageldan n Yidles Amaziɣ, ikka-d ikrafen-ddeɣ. Nitni ayed imlen i yinebbaḍen n Merruk is « nekren » Imaziɣen, is ur yad nnin ad uɣulen ɣer deffer.

Meqqar txater tedyant n Tlelli, idrus dɣi mayed issnen mayed ijṛan g 1994 (awed winna issnen idrus mayed ɣifes nnan) acku kigan n twuriwin ayed ittuskaren af ad tettyattu, af ad tettusfeḍ g twengimin n medden. Awed yat tmesmunt d-issektayen ikrafen-ddeɣ. Drusen iɣmisen d idlisen ɣifsen isawalen. Kra n twuri tazedgant urta ɣifsen ttugi. Gan ammi ur ǧin kkin. Ammi ttusfaḍen g twengimin. Kigan n medden ayed iran ad ttun mayed ijṛan. Ffɣen-d imeɣnasen seg ukurmu, ikcem-t umezruy n ukraf-nnsen.

Simraw n iseggwasen ay-a izrin ɣef ikrafen-ddeɣ. Aters (blessure)-nnsen waqila ijjey g wulawen n yinekraf d winin yimezdaɣ. Ilaq dɣik ad ittyaru umezruy n tedyant n Tilelli. Tawuri-ddeɣ ilaq ad tt-teg Tmesmunt Tilelli s iɣef-nnes. Tamektit-nnes ilaq ad ttuḥḍu, acku mek tedda imki, qqen ad taccek g ugeḍrur (poussière) u umezruy. Ay-a nnik ayed igan anaruz (espoir) n icenga n tmentilt tamaziɣt. Ur ilaq ad tt-inn-gulun.

Inekraf n Tilelli nnureẓmen-d g 1994 acku tamentilt-nnsen tga tuɣdimt (juste). Acku beddan idsen kigan n medden, ssergagen tanbaṭ s uzbu (résistance) d imenɣi-nnsen. Tamektit n yikrafen n Tilelli ilaq awed nettat ad d-tennarẓem seg ukurmu n ifesti g nn-tsul. Tawuri-ddeɣ ilaq ad tt-neddem.

Ilaq ku yan ad d-iger afus-nnes, irẓem timeḥḍa (archives)-nnes, yuru ayenna issen, af ad d-nessekfel ay-a n tmektit. Ad tedder. Ad temɣur. Af ad ur sar tyattu.

A. Azergi

Articles dans la rubrique :

Tilelli : 1994 - 2014
04/05/14
0
Dans ce poème que Omar Derouich avait écrit en prison, il rappelle son incarcération injuste lors (...)

Lire l'article

02/05/14
0
Ci-après des articles et dépêches publiés par la presse suite aux arrestations des militants de (...)

Lire l'article

02/05/14
0
Que des enseignants affiliés à un cadre syndical défilent le jour du premier mai est chose tout à (...)

Lire l'article


Rejoignez nous