Accueil > Actualité > Katalunya tuklal afus n Imazighen !
Katalunya tuklal afus n Imazighen !
Tadiwennit d Salem Zenia
vendredi 3 novembre 2017
par Masin
Di tegnitt-agi anida Kaṭalunya tettnaɣ ɣef tlelli-ynes mgal adabu n Ṣbenyul ixsen ad tt-irkeḍ yerna ad iṛṛez amennuɣ-ines, nefka-yas awal i Salem Zenia, amyaru-amedyaz aqbayli yettidiren di tmurt n Kaṭalunya, akken a ɣ-d-ifk tamuɣli-ynes ɣef taluft-agi.
Ihi attan tdiwennit nga yides.



Kaṭalunya tuklal afus n Imaziɣen !

Tamazgha.fr : Salem Zenia, mraw iseggasen aya i telliḍ di Kaṭalunya. Amek ar almi tferneḍ ad tidireḍ di tmurt-agi ?

Salem Zenia : Wissen anwa ifernen wayeḍ ? Di taggara n useggas n 2007, usiɣ-d d inebgi n Ugraw n Imyura Ikaṭalanen ad kkiɣ gar-asen kra n iseggasen. Deg-s ad nemsenfal timuɣliwin ɣef idelsan-nneɣ, ɣef tsekliwin-nneɣ, d usurif i d-nger deg ubrid n uslulli n yegduden d yidelsan ittwarkḍen, deg-s daɣen ad nemyussan imi yekka yillel d umezruy gar-aneɣ. Di tazwara nwiɣ ad kkeɣ sin iseggasen ad uɣaleɣ ar tmurt, ar deqqal sɣezfen-iyi tinnubga, rnan-iyi aseggas nniḍen i deg i d-nnulfan isenfaren ixutren ama ɣef Imaziɣen s umata ama fell-asen nutni (ɣef Ikaṭalanen)… Taggara neqqim maḍi.


Amek tufiḍ Ikaṭalanen ? Amek tufiḍ imeɣnasen-nnsen, ladɣa wid yettnaɣen ɣef timunent n Kaṭalunya ?

Agdud akaṭalan d agdud sxayen. Tekka fell-as tallit n wukmir d taɣezfant, ama deg umezruy-ines aqbur ama deg umezruy-ines amiran. Yelmed aṭas deg-s ɣer taggara. D agdud yecfan ansi i d-yekka, d agdud yessnen anda yteddu. Amennuɣ-ines ɣef tlelli d amedya di tmura n medden, imi d abrid n talwit d war takriṭ i d-yuɣ. Ɣer-s d wa kan i d abrid isuffuɣen. Lemmer ad d-yeffeɣ deg imawen n yemdanen wawal « wwet », ɣas ur yewwit yiwen, ad ittwarkeḍ wayen kerzen d iseggasen uya.
Imeɣnasen-nnsen d tirni mtawan ɣef ubrid n talwit d war takriṭ, ɣas ssnen-t d abrid ɣezzifen nezzeh, deg-s akessar deg-s asawen. Ran ad d-ǧǧen i tarwa-nnsen annar iberzen, zeddigen, i deg ur ttilint ccḥani neɣ tuḥsifin. Nnan « annect yebɣu yiɣzif ubrid, iswi-nneɣ ad t-naweḍ imi d azref-nneɣ i ɣef nettnaɣ ».


Waqila tutlayt tamaziɣt tettwaselmed di Kaṭalunya, yerna Ikaṭalanen fkan azal i Tmaziɣt…

Ma cfiɣ, deg useggas n 2004 i tuɣal tmaziɣt d tutlayt « taɣelnawt » n tmurt n Kaṭalunya, am nettat am tutlayin yellan di Kaṭalunya. Ass-a sɣaren-tt di temnaḍin d temdinin n Kaṭalunya anida ttidiren Imaziɣen d wid iran ad tt-issinen ɣas ur llin d Imaziɣen. Yal aseggas Anabaḍ akaṭalan ittak amur deg yedrimen-ines i wselmed n tmaziɣt d tdukliwin tidelsanin timaziɣin d yisenfaren nniḍen ma nnulfan-d. Ma d inabaḍen n tmura-nneɣ ama d Zzayer ama d tiyaḍ, ttakken idrimen-nneɣ i wselmed n Leqwran d tutlayt taɛṛabt am akken teẓram.


Amek tettwaliḍ ayen d-iḍran aguren-agi ineggura di Kaṭalunya ger wid ixsen timunent d udabu n Ṣbenyul yellan mgal timunent n Kaṭalunya ?

Taluft-a n timunent n Kaṭalunya d taluft ikersen mačči d kra. Iẓuran n taluft-a kkan-d send tallit-nni i deg ttemsaẓẓayent tilisa Fṛansa d Ṣbenyul, azal n kraḍ tmiḍa aya. Nezmer ad d-nini d taluft izemren ad tessenquqel seg iẓuran timura n tama-yagi n umaḍal ma ur s-ufin tifrat iwatan. Ɣef aya, timura i s-d-izzin kkrent-d d tixṣimin, ddant d udabu n Ṣbenyul, imi yal tamurt, ama d Fṛansa ama d Ṭelyan ama d Alman ɣur-s “Ikaṭalanen” ines. Ikaṭalanen ufan-d iman-nnsen ur zmiren ad sennden ula ɣef yiwen anagar ɣef iɣallen-nnsen. Ula d isuḍaf i ɣef tebna Tdukli n Turupt am izerfan n umdan d yizerfan n yiɣerfan, ur d asen-d-ttilin d tallalt. Adabu n Ṣbenyul yuggad ma teffeɣ-as Kaṭalunya tageldit, ad yerrurri s ugdud s udabu, ad yeglu ula s wiyaḍ. Tella taluft nniḍen daɣen s wazal-is : Kaṭalunya tsekcam-d 20% i tdamsa n tmurt n Ṣbenyul s umata. Ma ffɣen-as afus yedrimen-a ad as-taẓẓay tnekra.


D acu ara ybeddlen ɣef Ikaṭalanen ma yella wwin timunent ?

Ikaṭalanen tewweḍ-asen tfidi s iɣes. Ttewwten deg yedles-nnsen, di tutlayt-nnsen, deg imal-nnsen, di ṛṛay-nnsen, di tlelli-nnsen. Nutni qqaren nekkni d tamurt d agdud, adabu iqqar-asen kunwi d tamaṭ kan n tmurt. Nutni ssaramen aṭas n tɣawsiwin ara ybeddlen fell-asen ma lullin. Tamezwarut ad ilin d imawlan n tmurt-nnsen, tin ɣer-s ad d-yuɣal ṛṛay d ayla-nnsen, tutlayt-nnsen d tnettit-nnsen ad sent-yuɣal wazal i sent-ittwakksen, taxriṭ-nnsen ad teqqim ger ifassen-nnsen… Ma sdukklen-d akk tiɣawsiwin-a s irebbi-nnsen, d ayen i d tagduda. Ayen nniḍen ur yelli win yeẓran amek i d taggara.


Aṭas i d-yeqqaren d akken tuggti n Ikaṭalanen ur bɣin ara timunent. S tidet ?

Agdud akaṭalan akka tura ɣas ini yebḍa ɣef sin, wagi d tilawt. Azgen ira timunent, azgen iggumma-tt. Deg uzgen iggumman, azgen yuggad timunent, azgen yugi-tt. Ɣef akken tteddu taluft, nettwali simmal rennun-d yemdanen seg wid yugin timunent ɣer ugraw iran timunent.


Atan ussan-agi ineggura, adabu n Ṣbenyul ibegs-d akken ad irreẓ amussu akaṭalan yexsen ad isbedd tagduda n Kaṭalunya : yerra imdanen ar lḥebs, yekkes i yemḍebbren ikaṭalanen ayen illan ger ifassen-nnsen,... Amek tettwaliḍ taluft ? Ikaṭalanen wwin-d abrid izemren ad issuffeɣ ar tlelli-nnsen ? Neɣ adabu n Ṣbenyul ad issiweḍ akken ad irreẓ asirem n Ikaṭalanen ?

Annect-a, ur izmir yiwen ad d-yini ayen ara yeḍrun neɣ azekka amek. Ikaṭalanen beggsen-d ɣer timunent, imir teqqim-d ɣer bu-teɣruṭ d bu tḥerci. Zemren ad awḍen s iswi-nnsen akken izmer ad t-isegger umezruy wissen ar melmi ? Imi amennuɣ-nnsen yeḍra-d iḍerru deg unnar n uzref d usaḍuf.


Imaziɣen ilaq ad ddun ar yidis n Ikaṭalanen naɣ uhu ?

Imaziɣen ggten, d igduden. Lemmer d lebɣi, ikaṭalanen yezwar lxir-nnsen. Zgan bedden d yegduden ittwawḍen. Bedden-d ɣer tama-nneɣ, bedden ɣer tama n Imaziɣen, ugar n wid wuɣur nenwa tagmat. Nekkini zemreɣ ad d-iniɣ ma ur nemyuṭṭaf afus nekkni s iyennaten-agi, akken yeqqar Muḥya, nekkni s Imeẓyanen-agi, ur yelli win ara ɣ-iṭṭfen afus.


D acu ihi i nezmer ad t-neg i wakken ad nefk afus i Ikaṭalanen deg umennuɣ-nnsen ?

Ibeddi ɣer tama-nnsen ulamma s wawal.

Tadiwennitt iga :
Masin Ferkal.

Articles dans la rubrique :

Actualité
10/11/17
0
A l’initiative du Collectif de solidarité avec le peuple catalan, une réunion publique s’est tenue (...)

Lire l'article

09/11/17
0
Face à la complicité des Etats de l’Union européenne dans le projet de répression espagnole en (...)

Lire l'article

03/11/17
0
L’Assemblée nationale catalane (ANC) et l’Òmnium Cultural appellent, ce vendredi 3 novembre 2017 à (...)

Lire l'article


Rejoignez nous


modération a priori

Ce forum est modéré a priori : votre contribution n’apparaîtra qu’après avoir été validée par un administrateur du site.

Qui êtes-vous ?
Votre message
  • Pour créer des paragraphes, laissez simplement des lignes vides.