Accueil > Dossiers et documents > Mouloud Mammeri > Lebni n tmeddit d win yersen ghef ss’eh’
Lebni n tmeddit d win yersen ghef ss'eh'
Tadiwennit d Dda Lmulud at Maamer’.
dimanche 7 mars 2004
par Masin
Tadiwwenit agi d Dda Lmulud, teffegh-d di tesghunt "Tafsut" deg useggas n 1981. Ahat ad tili d tamezwarut akka ittwagen s tmazight.

TADIWENNIT

Tafsut : Asmi d-tessufghed’ ungal-ik amezwaru "Tawrirt n tatut" (La Colline oubliée), yekker kra n ccwal akken. Tzemred’ ad agh-d-tesmektid’ amek ted’ra tedyant ?

Mouloud Mammeri : "Tawrirt n tatut" teffgh-d di 1952, meh’sub sin iseggasen uqbel ad ibdu umennugh agi aneggaru garanegh d Fr’ansa. Di lweqt nni h’seb ulac Izzayriyen yuran tikdabin ama s tefr’ansist ama s tmeslayt nnid’en. Aseggwas nni ffghen-d sin wungalen kra n wussan kan garasen, yiwen d "Tawrirt n tatut" wayed’ d "Ddar ssbitar" n Muh’emmed Dib.
Bdan ijer’nanen ar d-ttmeslayen fellasen, yalwa d ayen d-iqqar, maca akken ma llan mwafaqen f yiwen lamer’ : belli armi d imiren i d-ssufghen yezzayriyen tikdabin f tmeddurt nnsen akken t twalin nitni s yiman nnsen (deg wannecta, ma tebghid’, zeglen cwit’, acku qbel nnegh nekwni, Jean akw d T’awes Amruc ssufghen-d netta isefra s tefr’ansist akw d tterjima n isefra n teqbaylit, nettat yiwen wungal isem-is "Jacinthe noire", akw si ldjiha nnid’en Mouloud Feraoun issufgh-ed ula d netta ungal : "Mmis igellil" (maca gher yiwen umazrag n temdint tamect’uh’t isem is Rodes).

Amur ameqwran n yezzayriyen fer’h’en imi d-nnulfan ssegsen imura, maca yiwen urbaa degsen icgheb at’as di tekdabt urigh nek. Wid iceghben akka d aggagen ikubar igrummiyen, nnan-ak : ayen irgazen d tulawin illan di "Tewrirt n tatut" tdaan iman nnsen belli d Imazighen. Di lweq nni tamazight d Imazighen ur ten-id-ttadren ara mad’i ikubar igrummiyen, am akken ur ttekkin ara yakw di tmurt. Maca nek d amaru. Amerwas amezwaru umaru d tidet s t id yini, matchi a tt-izewweq akken a ttaadjeb wa nigh wa nigh wa. Yerna tidet deg yemdanen ighef d-tettawi "Tewrirt n tatut" tban : las’el nnegh nekwni s Leqbayel d amazigh, tameslayt nnegh d tamazight ; nnigh-d ayen illan akken illa.
Maca aggagen agi d-nebder ur ughen ara tannumi sellen s wawal-a. Bdan laayad’ d tmucuha, yalwa d ayen d-ittawi. Yiwen iberreh’ di kra ujernan akken ar "Tawrirt n tatut" matchi d nek i tt-yuran, wayed’ isugh ar bghigh ad gregh faruq ger izzayriyen di lfayda n leh’kwem amharsan, wayed’ inna bghigh a d-snekregh amezruy yemmuten. S tidet yiwen yaared’ a d-issed’her’ acu n yisegh d-iwwi wungal i weghref n Lezzayer s lekmal-is. Di tilawt illa-yi di lbal uya : bghigh a d-sbanegh belli di tmurt n Lezzayer illa weghref amazigh s yidles-is, s tmeslayt-is d tgherma-s d umezruy-is ; ma d faruq cnan-t-id kan d tmacahut i wakken ad zewwqen tamsalt i wid ur nez’ri. Matchi d faruq ay ugaden, d tamazight i ugin.

Tafsut : Ladgha amek tella tekti n tmazight di lweqt nni ?

Mouloud Mammeri : Di tilawt takti n tmazight matchi a tajd’it’ mad’i di lweqt nni deg d-ssufghegh "Tawrirt n tatut", maca ted’âef, qlil n win tt-ittawin deg wqerr’uy-is. Llan kra inalmaden qqaren deg gherbazen ula d nitni ghursen takti agi, bghan ad sferken tamazight, tt’aqa degsen ughalen kecmen deg wkabar iwimi qqaren P.P.A. (Akabar n Weghr’ef Azz’iri : Parti du Peuple Algérien). Slid wigi, agdud mazal ur d-irra ara s lexbar.
Aayen ?
Tamezwarut : iqerr’a n ikubar igrummiyen qqar’en-asen i lghaci nnsen belli ayen ur nelli ara d ar’umi di tmurt n Lezzayer d aâr’ab, iwakken ad zgwezlen, iwakken ur ttadjan tad’wiqt i far’uq ger izzayriyen.
Tissnat : ghran kan leqraya talemmast, ayen tesaadda tmurt nnegh qbel anekcum n tinneslemt ghars ur as-fkin ara azal, nigh ur z’r’in ara akw amek illa di tilawt, si zzman amezwaru mi bdan imeklawen imazighen n T’asili la kellun ghef iz’r’a di sseh’r’a ach’al n luluf iseggwasen aya. Degmi ghillen (yerna tigewti degsen s nneyya nnsen) belli amezruy n Lezzayer (nigh n Tmazgha s lekmal-is) ibda si lqer’n wis sebâa, amzun ssin akin texla tmurt, ur tettwazdegh ara.
Maca nek, skud heddr’en akw akken, z’righ belli a d-yas wass n tidett. Acku tidett am zzit : xelt’-itt d wayen tebghid’ nnid’en, rwi-tt, h’ull-itt, u laqrar’ a d-tifrir. Day gettghummu yit’ij s ugherbal ? Day tzemred’ a sen-tinid’ i medden : igenni d azeggwagh, a k-amnen ?
Inna yas Ccix Muh’end :

« Ittusemma yakw d amqellaa
W’ibghan tayerza igenni ».


Akken ibghu yili, tughal tekti n tmazight la tleh’h’u.
Ger wid ittdaan yess izmer bnadem a d-ismekti aggad immuten icban Laymeche Ali, Aarmmar At H’emmuda, Fer’h’at Ali, Bennay Waali ; wiyad’ mazal ddren ar assa. Dagi ad iyi tsurfed’ a d-smektigh yiwen degsen, assa yewwed’ anda ara nawed’ : Muh’end Ameqwran At Si Aali (nekwni neqqar-as kan : Maamu Attaali), acku d netta i gslemden tikti n tmazight i Mouloud Feraoun armi yura takdabt "Isefra n Ssi Muh’-u-Mh’end" ssnen akw medden.

Tafsut : Tellid’ tesghar’ed’ tamazight di tesdawit n Lezzayer, yughal th’ebsed’...

M. Mammeri : D tidet sseghr’egh tamazight si 1962 armi d 1973 di tesdawit n Lezzayer. Maca ilaq a d-beggnegh si tura belli matchi d leqr’aya tuns’ibt, tezga-d kan d almud n sufella, i wid yebghan a tt-ghr’en mebla ma ur’djan kra n lfayda seg-s, slid lfayda n leqr’aya s yiman-is d unadi f las’el.

Dagi ahat ilaq a nughal cwit’ akka gher wayen yaaddan qbel 1962. Asmi lligh nek s yiman-iw d anelmad di tesdawit saaddagh akk inefd’as n tmazight anda ma llan (Pari, Lezzayer, Rr’bat’). Yella yiwen uselmad n tmazight di tnezlit taseklawit, d ar’umi. D’elbegh deg-s ad cerkegh akk yid-s deg uselmed n tmazight, yenna-k : "A leflani, mazal-ik mezz’iyed’ !".
Di 1962 mi d-newwi azarug ur as-uqimegh ara ccekk belli a tt-sseghr’egh. R’uh’egh gher lewzir ittkellfen ghef leqr’aya di lweqt nni, nnigh-as ; yenna-k : "A leflani r’uh’ ad tesseghr’ed’ tafr’ansist !". Ghas akken skecmegh tamazight deg yiwet leqr’aya akken ideg tufa amkan ghas matchi d uns’ib.
Maca inelmaden ghur-sen leqraya nnid’en ideg ilaq ad saaddin ikuyad’ (wamma tamazight, am akken d-nenna, ur s&in ara deg-s lfayda). Degmi di tazwara drus i d-ittr’uh’un. Maca di lweqt nni dgha, di Fr’ans’a, ixeddamen zgan-d d ighriben mer’tayen : yiwet lghwerba ixeddim di luzinat, tissnat n yidles. Di tmurt tabarr’anit ur ghur’sen ara tikdabin s tmeslayt n babatsen d jeddit-sen , ulac igherbazen, ulac ijer’nanen, ulac amezgun, isura, tilibizyu s tmazight, kulci alamma s tmeslayt n wiyyad’ ara t-id-yawed’. Ma ur ghlid’egh ara d nitni i yennan i warraw nnsen ad r’uh’en ad ghren tamazight, armi ughalen inelmaden ttasen-d s amsir d izumal.

Ghas akken inelmaden tt’uqten, mazal tamazight ur tens’ib ara di leqraya n tesdawit. Fih’el ma âiwdegh-d ach’al iberdan d wamek akk aar’d’egh a tt-nes’begh. Werdjin smersegh ayagi. A d-smektigh kan snat tikkal tineggura.
Di 1973 waqila, snulfan-d lqanun ajdid i tesdawit. Xedmegh tuttra i uneghlaf n leqraya taâlayant iwakken ad sseghregh tamazight. Yerra-yi-d tabr’at, yenna-d deg-s : "Tangiwin ilaqen ad ttwalemdent di tnezla tiseklawin n tmurt n Lezzayer llant akk deg weghtas utt’un akka d wakka." U tamazight deg weghtas nudagh-tt s teftilt ur tt-ufigh.

Yaâdda useggas. Yughal ufigh belli di lqanun ajdid yiwet tanga semman-as : tussniwin tigher’fiyin (les traditions populaires), ssgharen-tt deg usudu n taâr’abt. Amghar’ n tnezlit, igher rrigh, yenna-k : r’uh’ z’er’ akk d unemhal usudu. Qqimegh ur z’righ ach’al iberdan, ach’al n sswayaâ akk d unemhal usudu d kra isalmaden ittawi-ten-id yid-s. Seg wakken ur nemdjazi ara, nuzen mkul yiwen ahil-is i uneghlaf n leqraya taâlayant iwakken ad yefru. Setta iseggasen aya, beddlen tlata ineghlafen seg wassen ar ass-a, ur-âad ur d-rrin ara... Ineghlafen n tmeghri taâlayant n tmurt nnegh ad yili R’ebbi yid-sen, mecghulen matchi d kra !

Tafsut : Asaru « Tah’cict d uâekkaz » (L’opium et le bâton), amek llan wassaghen ger-ak d win t-id-issufghen ?

M. Mammeri : Gar-i yides ala lxir’, ma d tikta ines di temsalt n tmazight d tid n leh’kem t-irran d anemhal n lbiru isura. Tamsalt n tmeslayt, tamsalt isura, di tilawt agnu yiwen. Skud tamazight ur tettuneh’sab ara d tameslayt n tmurt, igna icban wagi a d-ttenfufuden wa deffir wa. Ameskar usaru, tamsalt n tmeslayt ur t-tecqi ara, netta tit’-is ad ismures asaru d-iger. Maca yez’ra tikta n leh’kem (nigh icukk-itent). Degmi yebda yekkes-as i teqsit’ akk ayen idr’an di Merr’uk, acku yedr’a yakk di tmurt Imazighen n dinna. Ulac yiwen umeslay n tmazight deg wsaru merr’a. Timseqqeft ibeddel-asen ismawen i sin yergazen : Akli akk d Aamir’uc. Iqqar’-as winna : ttnadigh wi ara d-iyi yed’sen d amnas’ef ! Ihi, am akken d-nenna zgelli, matchi deg sura kan i tud’en icc-is. Leghlad’ illa di llsas.

Tafsut : Amussu n tmazight acu twalad’ degs ? Ma tzemred’ ad agh-d-inid’ acu iberdan di tedmi-k ara yessiwd’en tamazight ad tili d tameslayt tatrart ?

M. Mammeri : Seg wasmi yebda umezruy tamurt-a d tamazight. Ihi amussu n tmazight d ayen yuran deg wful n Tamazgha, ur izmer h’ed a s yaared’ kra n tallit, ur izmir h’ed a t-imh’u. Llan aggad ittwehhimen amek armi werdjin tella tmazight d tameslayt tuns’ibt di Tmazgha. Di tilawt ilaq ad wehmen amek armi mazal Imazighen ttmeslayen tamazight ar ass-a, yili kecmen-ten-id ach’al n ledjnas seg Yefniqen (tarusi nnsen di Âutiq ttama n Aannaba di lqer’n tnac qbel Aysa) armi d Fr’ansis ur neffigh ara tamurt nnegh armi d 1962 ; u garasen kecmen-d Rr’uman , Iwandalen, Ibiz’ant’iniyen, Aar’aben, Iter’kiyen. Tamkerra d amek armi, baad tlatin n leqr’un n temharsa (nigh aad n temharsiwin), mazal nettmeslay tamazight, nessefruy yess u ssya ghef sawen a t nesselhu a t nessefrek.

Igwra-d ilaq an-nwali lih’ala akken tella di tilawt. Imi, ugar n tlatin leqr’un aya, kra yellan d tagherma yenfali kan s tmeslayin d-ikkan si berr’a : tafniqt, talatinit, tagrigit, taar’abt, tafr’ansist, tezga-d tmazight si zzman amezwaru tettwexxir’ di tenfalit, tughal ssexdamen-tt kran di tmeddurt n kullas nigh di tsekla timawt, texd’a i tmusniwin d tmusni âlayan ; mi gebgha umazigh a d-yini kra di tigi, tettarra-t tmara a tent-yaru s tmeslayin yellan d tuns’ibin di lweqtis.

Maca ass-a leqr’aya di lumur’ n tmeslayt d tsertit telh’a armi asefrek n tmeslayin icban tamazight matchi kan itmekken d atmekken, yett’ulli d tad’ullit. Tameslayt yett’fen ach’al n leqr’un aya yili yal tabucud’ant thubb-ed fellas llan deg-s imerkiden imaqqranen ; d amerwas fellanegh matchi kan annett’ef deg-s, a tt-nessefrek ula d asefrek, yerna ighar’awen llan.

Iwakken a d-yader bnadem ighar’awen agi yakw, yerna mkul yiwen a t-yagem, ilaq takdabt nigh xer’sum tazrawt ghezzifen. Ihi a ten-id-nesni kan wa deffir wa d llugha n webrid :

a) Leqr’aya :

Zik tamazight nettmeslay-itt kan d ameslay, tura ilaq a tt-neqqar’ a tt-nettaru. Ma llan igher’bazen akken axir’, mulac wa a tt-issghar i wa : ma yesseghr’-itt i yiwen yelha, ma i sin d lfayda, ma i aacr’a d rr’eh’ma, ma i meyya d lkimya. U ilaq a tt-ngher’ argaz tamett’ut : arrac uzekka d yemmat-sen ara ten-ir’ebbin di temz’i u s umata tafat n tmazight th’uza mkul yiwen, ur th’err’em h’ed.

b) Tameddurt :
Awufan an-nettmeslay tamazight di mkul mkan : deg wexxam d ayen ibanen, maca ula deg wezniq, deg yegrawen. Anda d-tezga txus’, ulac ughilif, an-nessexdem timeslayin nnid’en ar asmi ara tawed’ tmazight ula d nettat d tameslayt n tgherma tatrart.

c) Taz’ragt d umezgun :
Ilaq si tura a d-nessufugh s tmazight akk ayen izmer bnadem a t-id-issufegh deg-s, acku qqar’en : s wenjar’ i gettughal wemdan d anejjar’.

d) Amawal akkmazigh :
Wagi ghezzif ubrid-is. Tlaq terbaat ideg, mmar d lebghi, ad ttekkin imazghawalen n yal tamurt, ad ilin deg-s Imucagh, Icelh’iyen, Irifiyen, at Wat’las alemmas, Icawiyen, Imz’abiyen, Icenwiyen, Izennaten, Infusen d wiyad’ akk anda ma llan ; kul yiwen a d-iger s annar akk awalen yellan di tmazight-is netta, iwakken ad tmed tissi, akka ineggura ad walin acu n webrid iyess ara tefrek tmazight tatrart, dgha ad afen ansi ara d-jebden ayen h’dadjen.

e) Aheggi n tekdabin di mkul tanga :
Iswi nnegh nekwni : a d-yawed’ lweqt (a t-nâiwen akken a d-yawed’) ideg ara nessghar’ akk
tussniwin s tmazight. Ilaq di mkul tanga : tajerr’umt, tasekla, amezruy, tussna n tmurt, tusnakt, tagharant, takrura, atg...ad mlilen imazzagen nni nitni d imazzagen n tmeslayt, iwakken a d-jebden seg wmawal akkmazigh (nigh seg weghbalu nnid’en) ismawen ilaqen i tussna ten-icqan.

Wigi d ighar’awen yellan ger ifassen nnegh ass-a, wid illan n teswiât-a deg wfus n ddula, icban rr’adyu, tilibizyu, isura, leqr’aya deg gherbazen, tbaan tasertit n ddula, ama d dulla turz’imt ama d tuqmit’. N teswiât-a abrid d-tewwi ddula nnegh di lamer’-a n tmazight d uqmid’, maca ur izmir ara ad iqqim akka, acku lebni n tmeddit d win yersen ghef ss’eh’, matchi f tmuchuha d uzewweq n tidett.

Tafsut : Dgha di temsalt-a d-neksa akka, bghigh a k- in-steqsigh f tjerr’umt turid’ s tmazight ; akk d umawal atrar.

M. Mammeri : Amawal d tejerr’umt d ighar’awen imenza n tmeslayt. Urigh tajerr’umt n tmazight s tmazight d amedya. Tajerr’umt d yiwet ger tussniwin, ihi ilaq ad tettaru s tmazight. Izga-d di leqr’aya ghrigh asmi lligh nek s yiman-iw d anelmad, twellhegh s aya : ghr’igh kra n tmeslayin tiberr’aniyin yalta s tjerr’umt-is. Ihi ayen xedment tmeslayin-a kul yiwet i yiman-is, bghigh a t-xedmegh i tmazight. Xuss’en kra n yismawen ur llin ara di teqbaylit, nudagh di tmazighin nnid’en, jebdegh-ten-id ssyin, ah’ric ameqqr’an si tmaceght, acku deg-s i tt’uqten wawalen n tmazight tanes’lit.

Ayen ittwaxedmen di tjerr’umt izmer ad yili di tussniwin nnid’en akk. Ilaq-agh tura a tent-naanu nitenti cwit’ cwit’...asurif asurif alamma temmed-agh tirni.

Tura, am akken id-nenna zgelli, imagraden agi merr’a ittusemma nbedr-iten-id kan d abdar, d acellef i ten-id-ncellef, maca ilaq mkul yiwen ad ighez bnadem degs.

TAGRAYT
Tafsut :
Acu ara gh-d-inid’ d tagrayt ?

M. Mammeri : Tagrayt umeslay, ma tebghid’, a tt-id-nawi d taqsit’.
Yiwwas yiwen urgaz temmut-as tmett’ut, netta yugh lh’al yaadel yides, tesbedd-as axxam. Ighli-d fellas ughbel d ameqqwran. Assen ir’uh’-ed si tmurt taberr’anit yiwen uh’hib ad yerzu fellas. Isawel-as seg wezniq, irra-yas-d winna seg wexxam inna-yas :
Qer’r’eb-ed !
Ikcem weh’bib s axxam, yufa-n argaz yarra f ighallen-is, la itegg aghrum.
Inna yas : A leflani, acu d aya ?
Aqlak tettwalid’.
Inna-yas : D kec i la iteggwen aghrum ?
D nek. ?
I tmett’ut-ik ?
Tewwed’ anda ara nawed’.
I ketch s laaqel-ik ? Temmut-ak tmett’ut ur taawded’ ara jjwadj ?
Ur aawdegh ara.
Aayen ?

Inna yas : "Annagh laali
Ikfa-yi lqebd’ ikemsen.
Annagh dduni
Ugin leqlub d’elsen.
Ar akka nteggw, nfettel,
Ar d-yefk Sidi i gesteh’sen."

Ihi anneg awal-a d tagrayt n wawal nnegh ass-a.

- Amawal / Lexique

Tafsut, n° 2, Tiz-Ouzou, juillet 1981.

Articles dans la rubrique :

Mouloud Mammeri
05/03/09
0
Radio Tamazgha met en ligne une émission radio avec Mouloud Mammeri diffusée en 1987. Mouloud (...)

Lire l'article

25/02/06
2
Cet aricle a été publié sur Tamazgha.fr le 25 février 2006. Nous le (re)mettons en Une du site pour (...)

Lire l'article

22/04/04
1
"Féru de culture kabyle d’abord et surtout, mais aussi spécialiste des autres groupes (...)

Lire l'article


Rejoignez nous


2 Messages

  • > Tadiwennit d Dda Lmulud 18 mars 2004 15:47, par yidir
    Azul seg mi snegh sit n Tmazgha d tikkelt tamenzut i ighrigh ad’ris am wagi d ayen id-yettakken aveh’ri i turett ,ad’ris yuran si tazwara ar taggara s tmeslayt-nnegh arnut-ed arnut-ed am wigi ttxil-nwen ay At Tmazgha !!!!!

    Voir en ligne : tanmirt ay At Tmazgha !

  • > Tadiwennit d Dda Lmulud 26 juin 2004 02:58, par Winna

    Azul,

    Ayyuz i kenwi d irran tadiwnit-a deg wsabtar agi. Ghrigh-tt ahit i tikkelt tamenzut mraw-semmus iseggasen aya. Maca ass agi, imgarad imesli ines deg wmez’ugh-iw. Amek armi werâad d neffigh seg tgenarit ? Anda teddid’, ad-tafed’ imazighen ttmeslayen s tutlayin nnid’en jjan tinna nsen. Amek armi ur nga-ra am urgaz nni yugin ad-iâiwed zwaj. Xas akka nekkni ur temmut ara tin akken yuklalen tayri nnegh. Wa yefren tihuski n tefransist ma xas tugi-t, wayed’ yefren dduni n taârabt ma xas am win isegmayen ibekki ur yelhi i tad’ut wala i wyefki.
    Awal-a n Dda LMULUD i d iwwi deg tdewnit-a isulef a-t-nezuzer di yal amd’iq akken ad-yefti, akken a-d-isakwi wid tewwi tnafa seg mazighen, akken ad-ifkk asirem i wid yebgha ad-irnu usawen.

    Tanemirt s tussda.

    Voir en ligne : Ayyuz