Accueil > Actualité > Rmexzen n ccuṛfa tweddar-as ag tagrawla n Arrif n (...)
Rmexzen n ccuṛfa tweddar-as ag tagrawla n Arrif n Biyya...
samedi 26 novembre 2016
par Masin
Rmexzen aɛuṛubi n ccuṛfa di Rbaṭ, i dinni yegga ufṛansis d uṣpanyu, lebda ixes ad yarz tagrawla di Arrif s tnayen tmesrayin, ɛla ḥsab jjhed i ɣarsen ɣar igrawliyen n Arrif d ubeddi akidsen zi reǧnus nneḍni n baṛṛa, d "media international" n umaḍal. Tnayen tmesrayin-a, tina d : txizzut d uqabu. Ɛla ḥsab rmizan d jjhed mani yettmiyyar, ma ɣa rmexzen aɛuṛubi n ccuṛfa d icekkamen-ines d yenni das yarebbun txincit zeg Irifiyen d Trifiyin niɣ ɣar igrawliyen n Arrif ?


Twara-ya zi yenɣa rmexzen aɛeffan, ccahid Muḥsin Fikri, zi das nnan lpulis i yxeddamen n pizzorno n lbaladiyya n Biyya (Lḥusima) "Ṭḥen din mmu", yekkar-dd weydud n Arrif d izmawen d tezmawin-ines ffɣen-dd s wargaz d temɣart d iḥenjiren d tḥenjirin d tarwa-nsen d iḥenjiren imeẓyanen ksin ibanduten n Tamezɣa d ibanduten n Arrif, kessin di cciɛarat n "D Imaziɣen", "Ilyas barra", "Wa d Arrif-nneɣ, necnin d Ayt bab-ines, rmexzen aɛeffan ad yejmeɛ ixef-ines"... Rmexzen yeggwed, aydud n Arrif yeqqar-as : "Ndar-dd akidneɣ nanna-k, ad txeǧseḍ timezgura d tneggura di min deg-neɣ txedmeḍ di Arrif."

Min nezra di tagrawla n Arrif n Biyya ?
Min yegga rmexzen ḥuma ad yessexsi tagrawla n Arrif ?
Man bumbirus i dd-yessekk ḥuma ad yarz tagrawla ?

1. Yessekk-dd x umezgaru ibelṭajiyen, am Musa el Hayawan n PAM [1] s bandira-ines n Lyautey ɣar ssaḥa n imjahden, niɣ am ubelṭaji Abdelkader Daḥman ɣar rmuyyi, ura d netta s ibanduten-ines n Lyauty d lɛiṣaba-ines ihejjem x "media" d ssaḥafa yarezzun tidett x ljarima i yegga rmexzen s uḥray d weṭḥan n ccahid Muḥsin Fikri. Manayenni ur das yeffiɣ ci, rmexzen d ibelṭajiyen-ines arnun ttwafeḍḥen.

2. Yessekk-dd icekkamen d tcekkamin ad adfen ag igrawliyen, ad ten-sduqqzen zi adixer, am Rafik Daḥmoun anehjiw aɛuṛubi i yezzenzen 20 febrayer yextareq-itt zi adixer ar uneggar ussa mani yegga rkunnac n lijrimaɛat-ines innak yettut gi taxi j 3 n ǧiret ; d Yasmina el Farissi, tapampiwt, tamalakit, deɣya tudef di llejna deɣya teffeɣ. Minzi d wenni d taktik n lmuxabaṛat d icekkamen-nsen ttadfen ttefɣen ḥuma ad arrzen. Yina ggin ij n lḥaraka ag inehjiwen iɛuṛubiyen iqaɛidiyen, teffeɣ-dd zi Rbaṭ ur n rmexzen, semman-t "Ḥarakat 28 octobre", ḥuma ad ggen min ixes rmexzen di agenda-ines : "farriq tasud" ttaktik n listiɛmaṛ d iɣarbiyen.

3. Ixes ad iseɣ iwdan, amux das yegga ag ibeḥriyen wami xsen ifarq s imuturen n tɣarruba zi yemmut Muḥsin Fikri, kkaren-dd sɣuyyen cwitti, uxa sseɣden. D lmuɛeṭṭalun minɣa ur yeǧi bu rxedmet i yudef bu taksi n 3 n ǧiret d bu rkunnac n 20 febrayer, bdan ttfawaḍen di Ṭanja ag upampiw Ilyas Omari, minxef ssnekkaren igrawliyen tɣuyyet ukkarent. 4. Abelleɛ n webrid x ssaḥafa ddewliyya, d ucuwweh-ines, ugin ad ten-dd-jjen ad dd-asen ɣar Biyya, ssekken-asen-dd ibelṭajiyen n rmexzen, tteggen-asen arrwayed di tjarrayt maca waxxa ammen ur njiḥen ci, rexbar yewweḍ lɛalam d ddunnit ammen tekmer, tewweḍ ɣar wegraw n tmura imunen di New York, mani yeǧǧa urifi Jamal Benomar d argaz wis tnayen dinni.

5. Asigg°ed n igrawliyen amux das ggin i weyrad n iyraden i yessegguren tagrawla, Nasser Zafzafi, tteggen-as-dd ttehdidat s ttilifun : "ad ak-nekkes azeǧǧif", "ɣa nselxu din mmuk", "ɣa ngelsu din mmuk ɛla lqerɛa ya weld lqeḥba",...

6. Kur twara ad dd-ssekken ci n ijjen ḥuma ad yessweddar pista di tteḥqiq, ḥuma ad ssaren x lmujrimin imeqranen i yeǧǧan d ssabab di ljarima n Muḥsin Fikri, ad sweddaren ratar n ljarima. Am wig iɛebbẓen x ubuṭun, maci wi das yennan "’Ṭḥen din mmu". D Musṭafa Dira i dd-ssekken d aneggaru, innak iṣuwwar-dd wenni iɛebbẓen x ubuṭun. Maɣar ur dd-iṣuwwar ci kumisiṛ d upulis i das-yennan "Ṭḥen din mmu", amux yeqqar weydud i dinni yeḥdaren.

7. Xsen ad ssaren x lfasad arrecwet n lpulis, am upulisi Amin i das-yettaren i Muḥsin Fikri d icriken-ines 500 dh n arrecwet ḥuma ad tteffeɣ spada zi rmuyyi, d ddiwana, d lamarin d ijardaṛmiyen i ihettan rebḥar d iɣarruba d rmuyyi d wadaf d wufuɣ iserman, xezzaren ma ɣarsen "salida" niɣ lla ? Iserman ma memnuɛ niɣ lla ?

8. Xsen ur dd-jebbden ci lmileffat n ccuhada nneḍni am 5 nni n 20 febrayer 2011 i nɣin lpulis di kumiṣarya, ndaren-ten sskemden-ten di Lbank cceɛbi.

9. Uzzren-dd ɣar Ali Fikri, baba-s n ccahid Muḥsin Fikri, ḥuma ad yessexsi timessi minzima, sserhan-t s tteḥqiq, d ddewla n rḥeqq d rqanun. Maɣar Lmeɣrib d ddewla n tesɣart d wezref ? Maɣar ur das tt-ggin ag lmileffat n Arrif nneḍni d ljarimat kunta n bnadem di Arrif. Ibeqquyen 1898, lkimawi 1925, napalm 1959, tagezzart 1984, arni xes lixṭiṭafat n Ḥaddu Aqcic di 1956, d marra min iweqɛen zi ssinni ttsawent.

10. Rmexzen yetteɛyar x rweqt, ḥuma ad yessesɣed tagrawla n Arrif, maca igrawliyen n Arrif n yida, rid d igrawliyen n Arrif n idennat. Timessi tekkar, ibumbirusen n rmexzen dd-yettsekka, nfeḍḥen ggwaman as i tmessi ya.

Timessi ya, n Tagrawla n Arrif Tamaziɣt i yessirin ibanduten n Tamezɣa d ibanduden n Arripublik n Arrif, ceṭṭḥen ɣar reɛwin n Tirelli.


Muḥamed Ayoubi.

Notes

[1PAM : "Parti de l’authenticité et la modernité". Créé par Fouad Ali al-Himma consultant et ami de M6. Son secrétaire général est Ilyas Elomari, un rifain royaliste. Ce parti se veut anti-islamiste.

Articles dans la rubrique :

Actualité
22/04/17
0
Chez Gallimard dans la prestigieuse collection Poésie/Gallimard, vient de paraître l’anthologie (...)

Lire l'article

17/04/17
0
Un collectif de cinq associations appellent à un rassemblement pour commémorer le Printemps (...)

Lire l'article

30/03/17
1
Il n’a pas fallu grand-chose pour que les habitants de Gsar Ouled Debbab, au sud de la Tunisie, (...)

Lire l'article


Rejoignez nous


modération a priori

Ce forum est modéré a priori : votre contribution n’apparaîtra qu’après avoir été validée par un administrateur du site.

Qui êtes-vous ?
Votre message
  • Pour créer des paragraphes, laissez simplement des lignes vides.